A Coruña Convention Bureau, nas revistas Congresos e Magazine Eventos grazas ás achegas de Turismo de Galicia

A Coruña Convention Bureau reforzou a súa presenza no sector MICE coa súa aparición en dúas publicacións de referencia: Congresos e Magazine Eventos. No caso de Congresos, revista editada por Punto MICE, a cidade ocupa a contraportada do último número, un espazo destacado dentro da publicación. A peza presenta A Coruña como destino para congresos e eventos profesionais, poñendo o foco nas súas principais infraestruturas, como EXPOCoruña, Palexco e MEGA Museo Estrella Galicia, así como na capacidade do destino para adaptarse a distintos formatos.

O contido apóiase no concepto “A Coruña, un océano de encontros”, co que se resume a proposta do destino, combinando espazos, servizos e unha contorna vinculada ao mar que achega valor á experiencia dos eventos. Pola súa banda, a presenza en Magazine Eventos de Eventoplus permite ampliar esa visibilidade cara a un público máis amplo dentro do sector, incluíndo axencias, organizadores e profesionais vinculados ao mundo dos eventos en xeral.

Esta dobre aparición —que se produce grazas ás achegas de Turismo de Galicia— forma parte do traballo de posicionamento de A Coruña Convention Bureau en medios especializados, co obxectivo de seguir gañando presenza no sector e reforzar o papel da cidade como sede para congresos e encontros profesionais.