A Coruña Convention Bureau participa no foro “O futuro de Alvedro” para analizar o papel estratéxico da conectividade aérea
O xerente de A Coruña Convention Bureau, Álvaro Lens, participou esta semana no foro “O futuro de Alvedro”, organizado por El Ideal Gallego, un encontro centrado en analizar o papel estratéxico do aeroporto coruñés para o desenvolvemento turístico e económico da cidade e de Galicia. A xornada reuniu a representantes institucionais, profesionais do turismo e axentes económicos para reflexionar sobre a importancia da conectividade aérea e o impacto de infraestruturas como o Aeroporto da Coruña-Alvedro na competitividade do territorio.
Durante a mesa redonda “O aeroporto como motor da Coruña”, Álvaro Lens compartiu a súa visión sobre a importancia de contar con boas conexións para seguir impulsando o posicionamento da cidade como destino MICE e facilitar a chegada de congresos, convencións e eventos profesionais. O foro permitiu ademais poñer en valor o papel que desempeñou Alvedro durante as últimas semanas, coincidindo co peche temporal de Lavacolla por obras, asumindo un importante incremento de voos e ampliando temporalmente a súa oferta de destinos.
Desde A Coruña Convention Bureau seguimos traballando xunto a institucións e empresas para reforzar o posicionamento da Coruña como un destino preparado para acoller turismo e eventos profesionais. Deixámosvos a ligazón á nova e agradecemos ao grupo El Ideal Gallego que tivese en conta ao Convention Bureau para participar nesta xornada de alto valor.
FOTOS: EL IDEAL GALLEGO
La información MICE de A Coruña en tu mail
Conoce todo lo que sucede en el mundo MICE de A Coruña, suscríbete a nuestro boletín.
