A Coruña Convention Bureau, presente nunha xornada clave sobre xestión emocional e estratexia en eventos corporativos

O sector MICE volveu demostrar o seu dinamismo e capacidade de evolución nunha nova xornada profesional organizada por Event Managers Association (EMA), que reuniu en Madrid a máis de 70 profesionais do ámbito dos eventos corporativos. Un encontro no que a Fundación A Coruña Convention Bureau estivo presente, reforzando a súa aposta pola formación continua e o contacto directo coas tendencias do sector.

Baixo o título “Socorro: vivo en modo evento”A especialista Silvia Escribano ofreceu unha ponencia centrada nos desafíos do día a día do event manager corporativo, compartindo ferramentas prácticas para xestionar a presión e optimizar o rendemento en contornas de alta esixencia. A sesión foi presentada por María Gómez, presidenta de EMA, quen puxo en valor a importancia de xerar espazos de aprendizaxe e comunidade dentro do sector.

A xornada continuou cunha mesa redonda na que Ana María Perea e Fernanda Hawkes, socias da asociación, compartiron experiencias reais e aprendizaxes cos asistentes, abordando os principais retos aos que se enfrontan os profesionais dos eventos na actualidade.

Como peche, o encontro incorporou unha análise do propio evento en tempo real da man de Edgar Sanjuán, de Emogg, quen afondou na medición de emocións e outros indicadores clave para avaliar o impacto dos eventos, unha tendencia cada vez máis relevante no deseño de experiencias.

Celebrada no Hotel AC Atocha, a xornada combinou formación e *networking* de alto nivel, consolidándose como un espazo de referencia para o intercambio de coñecemento e a actualización profesional.

A participación de A Coruña Convention Bureau neste tipo de iniciativas permite seguir aliñando o destino coas demandas reais do sector MICE, incorporando novas ferramentas, enfoques e tendencias que contribúen a fortalecer o seu posicionamento como sede de eventos profesionais.