Lucía Suárez: “Debido á nosa condición de hotel boutique, ofrecemos unha atención personalizada e enfocada a todos os nosos clientes.”

Por favor, preséntate e cóntanos sobre o teu traballo en Double Tree by Hilton A Coruña. Son Lucía, Directora do Hotel Double Tree by Hilton A Coruña. Nacín e medrei nesta marabillosa cidade, estudei Turismo no que era o Centro Superior de Novas Profesións e en 2004 decidín irme a Nova York a probar sorte, algo que non me foi del todo mal. Na Gran Mazá tiven a oportunidade de traballar con grandes profesionais e diferentes cadeas como Radisson, Marriott e, como non, Hilton. Esta última cadea foi a que me deu a oportunidade de volver á miña cidade, A Coruña, en 2020 como Subdirectora, e foi en 2022 cando me convertín en Directora, posto que levo desempeñando desde entón.

Como ves o sector MICE da nosa cidade? É un sector en crecemento con moito potencial. Temos que aproveitar este momento para promocionar a nosa cidade e incentivar a celebración deste tipo de eventos. É unha cidade que está de moda, non só a nivel nacional senón tamén a nivel internacional, algo do que nós somos testemuñas polo feedback que recibimos dos nosos clientes.

Que destacarías da cidade como destino de eventos, feiras ou congresos? Na nosa cidade contamos con espazos máis que preparados para a celebración de eventos MICE. No propio centro da cidade, fronte a un dos paisaxes máis coñecidos como son as Galerías da Mariña, temos Palexco, un espazo que conta con diferentes salas en función da magnitude de cada evento. Contamos tamén con ExpoCoruña, lugar ideal para eventos de gran afluencia e cunha comunicación privilexiada cos accesos á cidade. Ademais destas dúas localizacións principais, ao longo da cidade dispoñemos de diferentes espazos tamén perfectos para a celebración de eventos MICE (Cámara de Comercio, Fundación Abanca, Centro de Belas Artes, etc.).

Que destacarías da túa empresa no seu traballo no día a día nos eventos MICE? Debido á condición de hotel boutique que temos, as nosas salas permiten a celebración de eventos de menor asistencia. O que si ofrecemos son unhas instalacións coidadas ao máis mínimo detalle, con mimo e excelencia. Ofrecemos unha atención personalizada e enfocada a todos os nosos clientes.

Como ves o futuro do sector MICE na Coruña? O sector MICE ten un futuro prometedor na nosa cidade, pero non debemos descoidar cuestións como a comunicación con destinos internacionais a través dos nosos aeroportos. Temos a gran sorte de contar cun aeroporto na cidade e outro internacional a só 30 minutos do centro da Coruña.

Coñecendo a Lucía

Que che inspirou a traballar neste sector e que segue motivándote día a día? O sector do Turismo é un sector en constante movemento, con cambios a cada minuto, non hai dous días iguais, e iso é algo que me encanta. Traballar con xente, non só cos clientes, senón tamén cos equipos do hotel, é algo que me enriquece a todos os niveis, algo que fai que non me aburra, o cal é importante.

Todos temos un lugar especial na cidade, cal é o teu e por que? A Praza das Bárbaras. A miña nai e a miña avoa tiñan o costume de levar ovos ás Clarisas cando había eventos familiares que celebrar, algo que facían case todas as familias da Coruña. Teño o recordo de ir alí de pequena e sentir que estaba a entrar nun lugar cheo de maxia e misterio.

Se puideras elixir calquera lugar do mundo para as túas vacacións ideais, onde sería e por que? Todo depende de se imos con ou sen nenos  Pero se puidese elixir, creo que iriamos a un resort en África onde os nenos poidan gozar da fauna e da natureza no seu hábitat natural.

Por último, hai algún mensaxe ou consello que che gustaría compartir cos teus colegas do Convention Bureau e do sector MICE na Coruña? Dende o sector hoteleiro, e creo que esta é unha opinión compartida con case todos os meus compañeiros e compañeiras directores de hoteis, estamos moi agradecidos polo labor que o Convention está a desempeñar á hora de promocionar a cidade e atraer clientes á nosa cidade.